هوامش على دفتر النكسة …أحمد فؤاد نجم
5-7-2011
الحمد الله خبطنا
تحت بطاطنا
يا محلا رجعة ظباطنا
من خط النار
يا أهل مصر المحمية
بالحراميه
الفول كتير والطعميه
والبر عمار
والعيشه معدن واهي ماشيه
آخر أشيا
مادام جنابه والحاشيه
بكروش وكتار
ح تقول لي سينا وما سيناشى
ماتدوشناشي
ما ستميت أوتوبيس ماشي
شاحنين أنفار
ايه يعني لما يموت مليون
أو كل الكون
العمر أصلا مش مضمون
والناس أعمار
ايه يعني في العقبه جرينا
ولا ف سينا
هي الهزيمه تنسينا
اننا أحرار
ايه يعني شعب في ليل ذله
ضايع كله
دا كفايه بس أما تقول له
احنا الثوار
الحمد لله ولا حولا
مصر الدوله
غرقانه في الكدب علاوله
والشعب احتار
وكفايه أسيادنا البعدا
عايشين سعدا
بفضل ناس تملا المعده
وتقول أشعار
أشعار تمجد وتماين
حتي الخاين
وان شا الله يخربها مداين
عبد الجبار
حزيران 1967