أخر الاخبار
أنت هنا: الرئيسية 2 الإبداع والإختراع 2 حكاية ” جيرانوي ” السويداء.. المدينة المتربعة فوق بركان لتصير قلب….كتبتها #منال_ ظفور ‏‎Manal Zaffour‎‏ ..‏..

حكاية ” جيرانوي ” السويداء.. المدينة المتربعة فوق بركان لتصير قلب….كتبتها #منال_ ظفور ‏‎Manal Zaffour‎‏ ..‏..

ربما تحتوي الصورة على: ‏‏نشاطات في أماكن مفتوحة‏‏

‏‎Manal Zaffour‎‏ مع ‏بهيج الطويل

من حكايا سوريا والسوريين..
حكاية ” جيرانوي ” السويداء..
المدينة المتربعة فوق بركان لتصير قلب….نبضه من نار مقدسة وجسمه قلعة من رجال….
من متحف للتاريخ مفتوحة بوابه ..تناوبت عا صنعه روعة الطبيعة وابداع اﻹنسان..
ويا حيا الله بمصنع الرجولة والشهامة والبطولة واﻹقدام..
من شهبا فيليب العربي..ل قريا سلطان باشا اﻷطرش..ل صوارة الكبيرة فزعة زهر الدين عصام لكل ملهوف باﻷرض السورية…
وبتبدا الحكاية من أقدم اسم للسويدا (جيرا نوي) وبتعني : جير =الحجر اﻷسود البازلتي.. نوي= (بتسكين النون) بتعني اﻷرض المجوفة..جيرانوي =يعني اﻷرض الحجرية السودا المجوفة… وأخدت السويدا أسماء كتيرة عبر عصور التاريخ منها : التسمية الكنعانية لكل منطقة سهل وجبل حوران باشان (أرض الخير والخصب..أرض العمالقة) .. وسموها اﻵراميين الطل =الندى (من طلية بنت بعل) ﻷنو الندى كان يغطي الجبل.. وسموها اﻹغريق ترايهونتيد..و أورانتيد =وبتعني بلاد الحجارة والمغاور… والرومان سموها آمالدانوس = وبتعني بلد الخير والخصب والماء..وكمان أخدت أسماء وألقاب كتيرة :_عتيل _التبنية _جبل أم حوران _جبل الريان _الضلع _وسماها المستشرقين بالجبل اﻷسود _أما الباب العالي (العصملية) والفرنساوية فسموها _جبل الدروز _وطبعا كان قصدن بالتسمية عنصري استعماري لخلق نوع من الحساسية بين الجبل والسهل
_وآخر لقب للسويدا كان جبل العرب..وآخر اسم (اﻹسم الحالي) كان بأيام الوحدة بين سوريا ومصر..نسبة لمدينة السويدا الرئيسية بالمحافظة وﻷنها شكلت صمام أمان لوحدة سوريا فشكلت القلب ونجمة الشام ومن يومها صارت اسمها سويداء القلب..وأجمل لقب هﻷ منقولوا هو جبل العزة والكرامة..
وبعد أسماء السويدا وألقابها الجميلة ..خير الكلام عالسان أهلها بيبدا ب
” يا حيا الله ” وبتعني = الله يعطيكن الحياة ويعيشكم ويطول عمركم.. وهي كلمة ترحيبية مليانة حب ومحبة مابتفارق لسانهم.. ف يا حيالله ياسويداء القلب..
وقبل الحكاية رح عرفكن عالسويدا…
السويدا هي أكبر وأهم محافظة بسهل حوران بتتربع فوق قمم سلسلة جبلية بركانية (ما تخافوا البركان خامد)..بجنوب سوريا وبتحدها من الشمال ريف دمشق ومن الجنوب اﻹردن ومن الغرب درعا ومن الشرق بادية الشام (السماواه حكيتلكن عنها)..وبتتميز بجمال الطبيعة الخلاب والمناخ المعتدل والبارد بالصيف والبارد جدا جدا بالشتي..والجبال فيها مغطاية بالخضرة واﻷحراج والغابات الطبيعية ..فيها مجموعة من الينابيع الطبيعية وبيخترقها عدد من اﻷودية الموسمية اللي بتتشكل من دوبان الثلوج..وفيها مجموعة كبيرة من السدود والبحيرات عددهم فوق ال 18 سد وبحيرة ..متل :_ سد بحيرة الروم _سد حبران _ سد جويلين _ سد السهوة _سد الرحى _ سد الزلف….الخ
وبتتكون المحافظة من مجموعة من المدن أهمها السويداء..صلخد..شهبا..
ومجموعة من البلدات متل قنوات..الكفر ..القريا.. عريقة ..سقا….وعدد كبير من القرى والمزارع الموزعة بأربع مجموعات باسم المقرن وهي :قرى المقرن الشمالي..وقرى المقرن الجنوبي..والمقرن الشرقي.. والمقرن الغربي..وعددهن حوالي ال 100 قرية ..متل بكا..بوسان..حران..الخربة..خلخلة..راما.. رساس..سكاكة..مياماس..طليلين..قيصما…الخ
والسويدا هي متحف مفتوح بالطبيعة لﻵثار واﻷوابد التاريخية اللي عمرها آلاف السنين..(عثر علماء اﻵثار بمواقع عديدة وبمعظم أنحاء المحافظة على أدوات صوانية منحوتة كان يستخدمها انسان ماقبل التاريخ..وكهوف ومغاور كان يسكنها..متل موقع _مراج كوم التينة (شرق قرية ريمة اللحف) _ موقع مراج المزرعة (قرب السويدا)_ موقع قراصة _ كوم الحصى _حزمو _الشبكي _تل الدبة (جنب قرية البريكة )_ دير اﻷسمر (بين نجران وأم العلق)….وكل اللقى اﻷثرية بتدل على استقرار اﻹنسان اﻷول بهالمنطقة..
وطبعا موجودة آثار عديدة ومتنوعة لحقب وعصور لاحقة من اﻵراميين والكنعانيين واليونانيين والبيزنطيين والرومان واﻷنباط. وغيرهم…هالشي خلا السويدا تشتهر بأنها متحف طبيعي بيضم الكتير من اﻷوابد التاريخية اﻷثرية بالمدن والمواقع والقرى والبلدات وبكل أنحاء المحافظة وبتتمثل هاﻷوابد بالكنائس واﻷديرة ودور العبادة..والمعابد..اﻷبنية اﻹدارية..خزانات وأقنية المياه..الجسور والقناطر الحجرية..الساحات اﻷثرية والقلاع والحصون..ولوحات الفسيفساء النادرة (قرية المجدل)..ومسلة (قرية سليم)..بيوت ومنازل ..الكهوف الطبيعية (قرية ثعلا).. والمغاور اﻷثرية (قرية عريقة) ومنحوتات وتماثيل حجرية.. الحمامات والمدرجات واﻷعمدة والمسارح والبوابات وأقواس النصر..
ومن هالمواقع :عتيل..سليم..بريكة.. سقا.. داما.. عرمان.. المشنف.. ملح.. ثعلة.. خازمة.. حبران….
ومن أهم المواقع :_المزرعة_بتحوي آثار عديدة باﻹضافة ﻷهمية موقعها ..صارت فيها معركة المزرعة الشهيرة اللي واجه فيها أهل الجبل (بقيادة سليمان العقباني) المحتل العصملي…
_امتان (موناثا)_شهدت العديد من الحضارات المتعاقبة وبيمتد تاريخها القديم ل 8000 ق.م…وشهدت معركة مهمة بالتاريخ انهزم فيها السلوقيين (أحفاد اﻹسكندر اﻷكبر) أمام اﻷنباط والعرب…
_صلخد (صرخد)_ فيها حصن من العهد اﻷيوبي..بيتصل مع قلعة بصرى بنفق بيمتد تحت اﻷرض بين المدينتين..وفيها قلعة صلخد الشهيرة المبنية على تلة بازلتية ..بترتبط مع باقي المواقع بشبكة من أبراج المراقبة واﻹستطلاع..وبالقلعة قاعات وممرات ودهاليز وسراديب وأنفاق.. ومؤلفة من 3 طبقات وبيحيط فيها سورين..واحد منهن بشكل شبه دائري…
_ أم الرمان (ريمونا) _موجود تحت البلدة عدة طبقات أثرية ومن اﻵثار المهمة فيها..البرك التاريخية وأدراجها الشاهقة اﻹرتفاع..بترتبط عدة برك مع بعضها بشبكة تحت أرضية من القنوات المائية… وفيها كمان مغارة الهوة أو (أم الرمان)
عمرها مئات آلاف السنين وهي مغارة طبيعية بازلتية مكسوة بالكلس…
_ عريقة (اهاريت..عهريت) _فيها أبنية قديمة من الحجر البازلتي.. وفيها مغارة عريقة وهي من أكبر الكهوف البازلتية الطبيعية المنشأ..مؤلفة من 3 كهوف متصلة ببعضها بأنفاق وعلى مدخلها الرئيسي في باب منحوت من الحجر (باب حلس القديم)..
وبتتبع لعريقة _هضبة اللجاة_ وهي عبارة عن صبات بازلتية هائلة ونادرة بالعالم..وهي وعرة جدا وفيها العديد من الكهوف و الجروف والتشكيلات الحجرية المميزة ..وتحت الهضبة مسطح هائل للمياه الجوفية..ومرشحة انو تكون محمية طبيعية عالمية ﻷنها واحدة من المناطق اللي نشأت فيها البشرية..
_قنوات (قاناثا)_من أشهر المدن اﻷثرية بعهد اﻹمبراطورية الرومانية الشرقية وهي من مدن حلف (الديكابولس) (المدن العشرة)..غنية جدا باﻵثار فيها: أبنية ملكية وساحات وطرقات ومعابد عديدة جدا ..معبد زيوس..معابد التراسات..معبد هليوس (الشمس).. معبد أثينا (الهة الحكمة).. معبد اللمثيميوم (آلهة الماء)..وفيها حمامات وخزانات وشبكة أقنية المياه..والمسرح..اﻻوديون..البوابات ..السور المدافن ..اﻷبراج..الكنائس البازليك..اﻷديرة….
_شهبا (فيليبوبولس)_طبعا اتسمت ع اسم اﻹمبراطور الروماني السوري اﻷصل
(ماركوس يوليوس فيليبيس.).فيليب العربي ابن مدينة شهبا القريبة على بصرى..فيها آثار من العصر الحجري (تل شيحان…تل الحجل)..فيها عدد من الكهوف المغاور..لعبت شهبا دور كبير وهام بالعديد من الحضارات اللي مرت عالمنطقة وبعهد فيليب العربي زاد اﻹهتمام فيها وخلاها من أهم المدن باﻹمبراطورية الرومانية الشرقية فأحسن تحصينها و تنظيمها وعمرانها وصارت نموذج للمدن الرومانية ومركز هام للقيادة..اتميزت بشوارعها المرصوفة بالحجر (شارع ديكومانوس) والبوابات اﻷربعة مداخل المدينة..وأقواس النصر…وطبعا فيها المتحف الموجود فيه أجمل وأندر لوحات الفسيفساء بالعالم….
_القريا (قريثو)_فيها آثار لحضارات عديدة من عهود متنوعة متل المدرج (العمد) اﻷثري ومباني ومعالم أثرية قديمة جدا..وتاريخها المعاصر حافل بالبطولات وانكتب بحروف من دهب فمنها انطلق قائد الثورة السورية الكبرى سلطان باشا اﻷطرش ضد اﻹحتلال الفرنسي..وحافظ مع قادة الثورة على الوحدة الوطنية وعدم تقسيم البلاد السورية….
_صورا الكبيرة (ساوارا القديمة)_شهدت حضارات عديدة بعهود مختلفة .. فيها طريق مرصوف بالبازلت بيمر من شرق صورا بمحاذاة وادي اللوى حتى أم الزيتون ليوصل عالسويدا …وكمان تاريخها الحديث عم ينكتب بحروف الدهب بدأ بعنوان فزعة نافذ أسد الله عصام زهر الدين لأرض سوريا …
يعني السويدا هي متحف ضخم بالهواء الطلق ..كل حبة تراب وكل حجر فيه بيحكوا حكاية من عمر الزمان..بيحكوا كيف اتكون هالسوري ابن المنطقة المجبول بالطيبة والمحبة والجود والكرم والشجاعة و البسالة و اﻹقدام اللي كون مخزون كبير من القيم اﻷخلاقية اللي أنتجت موروث انساني أدبي (مجموعة من اﻷدباء والكتاب والشعراء والحكماء والعلماء) وتراثي وفني فلكلوري رائع وجميل
وأهل المنطقة هنن من الناس اللي بيفيقوا الشمس..ناس مجدين مجتهدين مبدعين وبارعين بكل عمل بيقوموا فيه (بكل المجالات ..من العلم والفن للزراعة والحرفة والبناء والتجارة والصناعة ووو….الخ )..وبيعتمدوا باقتصادهن عالزراعة (اللي انعرفت بالمنطقة بوقت مبكر وقديم بالتاريخ) المشهورة فيها السويدا بسبب تربة أرضها البركانية الخصبة الصالحة للعديد من الزاراعات اللي بتعطي محاصيل عالية الجودة…ففيها محاصيل وزراعات قديمة من زراعة البقول والحبوب وخاصة القمح لﻷشجار المثمرة وأهمها الزيتون والعنب والتفاح …طبعا أقاموا عدد كبير من الحرف التقليدية والمهن والصناعات اللي بتعتمد على هالمحاصيل (متل صناعة الزيوت والصابون والعرق والنبيد والدبس وصناعات غذائية مرتبطة بالحبوب والقمح ..وصناعة السجاد ….) وتاريخيا كان بالمحافظة العديد من المدن المشهورة كأسواق تجارية هامة بعصور الحضارة المختلفة….
وهﻷ…. كل هالحكي اللي حكيتوا ما هو الحكاية….!!! ﻷ…
الحكاية هي السوريين أهل السويدا أبناء بعل وعشتروت..نبض النار المقدسة وحكاية الرجولة والبطولة..أهل الجبل..جبل الريان..بني معروف أهل المعرفة والحكمة ..أصحاب التاريخ الحافل بالمواقف الوطنية واﻹنسانية…شيبها وشبابها ..نسائها ورجالها..حملة الهوية والتراث السوري اللي قلوبهن مرتبطة باﻷرض السورية وأرواحهن حراسها..عنوانهن العزة والكرامة والشرف واﻷصالة..
لما ناداهم تراب سوريا…قدموا أرواحهن قرابين على مدبح الرب..وهيدي هي الحكاية..
ويا حيالله يا سويداء القلب..وحييتم يا سوريين …..وتحيا سوريا……

ربما تحتوي الصورة على: ‏شخص واحد‏
ربما تحتوي الصورة على: ‏‏نشاطات في أماكن مفتوحة‏‏
ربما تحتوي الصورة على: ‏‏‏‏منزل‏، و‏سماء‏‏ و‏نشاطات في أماكن مفتوحة‏‏‏
لا يتوفر نص بديل تلقائي.

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>