كل سنة وانتم طيبين ياعدولاتي جبتلكم النهاردة طريقه الترمس واحنا عندنا بمصر الترمس من الاساسيات في الصيف والاعياد
ياسلام علي الترمس وانت بتتمشي علي كرنيش النيل ولا كورنيش اسكندرية في الصيف باليمون والملح وفي الجنينة ياسلام روعة
المكونات
اولا احنا بنشترية من عند العطار او من السوبر ماركت يعني انا شرياه من كارفور بيكون معبأ في اكياس الكيس حوالي كيلو
بتلقية في منطقة التوابل او اسألي علية البائع اللي بيبع التوابل في السوبر ماركت وعلي فكرة في منه الحلو والمر بس هنا انا لقيت الحلو وده بيتاكل على طول بعد السلق اما المر لازم غيري علية يومين او تلاتة بعد السلق والمر مفيد جدا لمرضي السكر
الطريقة
اولا بنجيب الترمس وننقية ونغسلة وبعدين ننقعة ليلة كاملة يعني من بليل للصبح ودي الصورة
وفي الصبح هتلقية زاد الضعف او اكتر يعني لو كيلو هتلقيه حوالي 2 كيلو ودي الصورة بعد ماتنقع ليلة كاملة
وعلي فكرة لازم لازم يتنقع ليلة علشان ما يغبش في السلق يعني لو منقعتهوش ممكن يقعد طول اليوم يتسلق وبعدين في الصبح بنغير المية وبعدين نحطة في حلة ونسلقه علي النار حوالي ساعتين او ساعتين الا ربع وممكن اقل يعني كل شوية شوفية وطلعي حبة واتفحصيها لو استوت يبقي خلاص اطفي علية النار ودي صورتة بعد ما استوي
وبعدين لما يبرد غيري علية المية وعلي فكرة ماترميش ماية السلق حلوة قوي للشعر اغسلي بها شعرك ممتاز وحطي علية ماح وكمون وليمون وممكن تحطي علية ماية وملح وتحفظية في التلاجة بيقعد فترة كبيرة وبالهنا والشفا