آسفهْ .. بحبـَّكْ
محكي لـِ عبـَّاس سليمان علي
****=****=****=****
قالتْ بـْ غفلهْ خاطفهْ
بحبـَّكْ أناُ وْ ما عارفهْ
متلِ اللّي فلتـِتْ من عقلها شفايفي
بحبـَّكْ أنا ..
وْ قالتْ بعدها .. آسفهْ ..
لـِكْ ليش حتى آسفهْ ..!!
والحبْ ما بـْيعرف أسـَفْ
والحبْ لو قلبـِكْ خطـَفْ
بيكون الله من السَّما ..
عـَ القلبْ من لطفو لطـَفْ
والحبْ ما هوّي ذنبْ
حتى يـْخبـّيه الكذبْ
ويـْ خافْ من حبـّو القلبْ
ما هـُوْ مزحْ .. ما هـُوْ لعبْ
متلو متلْ طوفانْ مجنونُ وْ زحـَفْ
وْ طوفانْ حبّي لو أخد ..
قلبـِكْ بـِدربو تا انـْجرَفْ
لا تـفكري قلبـِكْ غلطْ ..
أو راحْ عنـِّكْ وانـْحرَفْ
لـِكْ لأ ..
قلبـِكْ شعرْ بالحبْ تا هيكِ انـْخطـَفْ
وْ طار بـْ مدى مسحورْ ..
صعبهْ يـِ نـْوصفْ
وْ شو عاد ينفع وقتها أيـّا أسـَفْ
لا تصفنيُ وْ تـِتردّديُ وْ لا تـِخجلي ..
وْ لا هيكْ تـِبقي خايفهْ
وْ لا عاد تـِحكيها إلي ..
بحبـَّكْ .. ولاكنْ آسفهْ
= 6/12/02013 عبـَّاس سليمان علي
