شو رأيكون منضل ؟.. أو منروح ..
شو رأيكون منفل ؟.. أو نبقى ..
شو رأيكون منودعا للروح ..
أو نسرقو لعمرنا سرقة ..
الروحة ألا ترتيب ..
عن هالوطن منغيب ..
عن هالصور ..
عن هالعمر ..
عن هالبحر ..
عن هالجبل ..
عن هالسهل ..
عن هالأهل ..
عن هالدني المتل السحر ..
عن كل مفرق وموعد وملقى ..
وعن كل أخ وصاحب ورفقة ..
عن كلّ بيّ وأمّ ..
عن كلّ حضن يضم ..
عن أرضنا الـ بتلم ..
وترابها المنشمّ ..
عن شمسها ..
عن ليلها ..
عن كاسها ..
عن ناسها ..
ويا ويلنا ما أصعب الفرقة ..
والمكتوي شو بتوجعو الحرقة ..
أو لاء .. رح منضل ..
منضل متل الكل ..
عَ الجرح ننثر ملح ..
وع الوجع نعصر خلّ ..
ونضل ما منفل ..
مع كل هالتعتير ..
ونضل بين الفل ..
واللي يصير يصير ..
ونعيش بين الغلّ ..
والغش والتزوير ..
والحرب .. والضرب .. والقتل والسرقة ..
والياسمين المرتوي بحرقة ..
ومع كل فجر نهلّ ..
نعانق سما هالأرض ..
ونصولها ونجول ..
ونفرض حلمنا فرض ..
ونعيشها بالطول ..
ونموتها بالعرض ..
ويا منقتلو للغول ..
أو يطردونا طرد ..
ويا حمصنا ما أصعب الملقى ..
ويا سوريا ما أصعب الحرقة ..
ونضلّ رح منضل ..
ونموت ما منموت ..
ومنروح ما منروح ..
ومنبقى .. أي
رح منبقى
أبو عيسى ..
