“زهرة كفربو” هذه القصيدة إلى روح شهيدتنا الطاهرة عروستنا الحلوة نور العين ( الشهيدة البطلة نور رفعت شموط ) – د. الشاعر شحود زيدان ..

صبيّة متل الورد سبحان من خلق بوجها السعد لفِدانا وفت بالوعد و طالتها رصاصة غدر

كفرباوية و أُخت رجال معروفة بحُسن الأفعال و بالأخلاق كانت مثال الأدب و العفة و الطُّهر

عروس مكللة بالغار دوم على بلادها بتغار قتلوها الأوغاد الكُفَّار و أورثونا العذاب و القهر

شو ذنبها الطاهرة الوفيّة راجعة لأهلها من الكُليّة اغتالوا أحلى صبيّة و انطفت شعلة فكر

بنت رفعت يا نور العين متلِك الله ما خلق اتنين أُغنية بأروع لحنين و أجمل قصيدة شِعْر

يا زهرة كفربو البهيّة و شهيدة سورية الأبيّة أنتِ شرف القضية و كرمالِك غالي المَهر

نور يا آية من الجمال مجدِك باقي بكفربو تِمثاك عزّ و كرامة للأجيال على مدى الدهر

ضرب الإرهاب بلدتنا أخد أكبادنا و مُهجتنا خيرة الشباب و نور عتمتنا و انكوينا بلهيب الجمر

ما عاد نقدر ع لوعة المِحَن سكن بقلوبنا الشَّجن يا ربّ ساعد هالوطن و أعطينا الصبر

بعزّي أهلِك الغوالي بيت شموط أصحاب الجَلالِ و بقللهن نور رح تبقى في البالِ طول العمر

مصابكن هز البلد من الكبير للولد الله يصَبِر الأهل و يعطيهن المَدَد و لمحبّة الناس الشّكر

نحنا أهل الوفا و الناموس يا ريت خسرنا الفلوس و ما انجرحت النفوس و انخدش لشاب ضفر

ما كفانا الحزن ع الشُّهداء لسّى بيخطفولنا الشُّرفاء أولاد الأصل الأنقياء ورود كفربو و العطر

أضنت القلوب الآلام مآساتنا ما بتنوصف بكلام حرقوا أفراحنا و الأحلام و دبل بالبستان الزهر

مهما طال الزمان أو قَصَر راجع لسورية النصر أرض العنفوان و الفخر و من بعد الظلام الفجر.
23/06/2013

بقلم الدكتور شحود إيليا زيدان