يا أنت ….إي بهواك..؟!!
* الشاعرة:فخرية رسلان
فتِّش بريحة…بنّا
شهوة الهيل
استنفرتْ
قطعِتْ ع غرّة فجرْ
مستعجلة توعيك
الفنجان مل و ناطركْ
من كم قهر
طعم شفافك ها لسحرْ
طوَّى سرارو فيه
*****
بكذب عليك
ان قلتلك
شي يوم رح إنساك
وانسى مشوار
ابتدا
بيناتنا…
بليل ومضى
يقطف فراشات الوله
برَقصْة”مجنون الحلم”*
وياكْ
*****
بكذب
إذا ما بلوِّن جنون المطر
بالف آه وآه
ولكْ آه شو بتذكرك
وبحنِّ لكْ
وخربش بحبر الصمت
ع لوح القدر
بهوااااك………
إي بهواكْ..!!
*****
بكذب ع قلبي …..
اللي انكسر
ع قزاز شباك السهر
خلّف أثر
وبعدي أسيرة ها لأثر
لبْيشرح خيوط الوجع
بلوحة عذابي
معاكْ
*****
بكذب ع بحرك
ع المدى
يا بحر…
لا تبعثر صدى
شهوة سهر عينين
خطوتهُن سفر
وكل الدّني
الْ بتهمني خبيتها
.. جوَّاك !!!
**مجنون الحلم:زوربا ورقصته الشهيرة
6/10/2012