Manal Zaffour هنا مع Salman AlAhmad
رفقاتنا الرائعيين كنعان وعشتار
بعيد ميلادكن السنة رح جاوبكن عالسؤال الازلي اللي بدون جواب ومحيركن من لمن كنتوا صغار. ومحير جفرا ومارسيل وانانا وديشن والعيلة والحارة وو و.. ..
السؤل : “ماما.. نفسي اعرف وين اختفوا باربيات عشتار (جمع باربي) وسياراتي الماتش بوكس ( ألعاب بشكل سيارات صغار )”…؟؟؟
اي رح جاوبكن :…. فتت عا غرفتكن مرة فصعقت بالمنظر.. عالأرض في شي مية باربي من كل الجنسيات وشي ميتين سيارة ماتش بوكس من كل الموديلات.. وكانوا الباربيات عم يتخانقوا عا لسيارات.. قمت عطيت لكل باربي سيارتين وصفوا ورا بعض وفتحتلن الباب (باب الصندوق الكبير) ومشيوا.. ولوحتلن بأيدي لحتى اختفوا وسكرت الصندوق ورميتو بالبير العتيق اللي حد النهر وبعد شي يومين شفت الصندوق طايف عا وش المي و عم يجروه السمكات لحد ما وصلوه عالضفة قاموا فتحوه وبلشوا يتخانقوا عالباربيات والسيارات.. قمت جبت سنارة واصطدت الصندوق ورجعت خبيتوا بمكان غير الجني الأزرق ما بيعرف وينو.. وهيك انا والجني الأزرق نسينا وين خبيناه.. ههههه
وهيدي هي القصة… أي بس استنوا شوي نحنا ماعنا صندوق كبير ولا بير عتيق ولا نهر ولا سمك ولا جني ازرق ولا غير الوان….
المهم بالحكاية انوجاوبتكن عالسؤال..
انو مافي شي بيضل عاحاله ودايما َ في تغيير.. ويمكن التغيير هو الشي الحقيقي اللي بيعلم وبيطور حال الإنسان..
كونوا انتوا.. متل ما انتوا.. العقل الواعي والجمال الروحي المزين بالمحبة لاهلكن ورفقاتكن وبلدكن ولكل شي بتعملوه بالحياة…
رفقاتنا الحلوين.. توأمنا الرائع كنعان وعشتار.. منحبكن انا وبابا ومنفتخر بوجودكن بهالحياة وبكل شي بتعملوه.. ومنتمنالكن ايام أجمل وحياة أرقى وأنقى ببلدكن سوريا..
وكل سنة وانتو بألف خير.. وعقبال مية سنة كلها حب وخير وأمان وسلام….
ملاحظة : الصورة الأولى: قالب الكاتو شغل عشتار بموسكو.. والصورةالتانية هيدي زهرة السيكا بالجنينة .. .