بزجلية بدائية بتقول :
أرض الشمس مكان طاهر..أرض الشمس مكان نظيف
أرض الشمس مكان مضيء… أرض الشمس مسكن اﻵلهة
بأرض الشمس لاتنعق الغربان
بأرض الشمس لا تصرخ الشوحة صراخها الحزين
حيث اﻷسد لا يفترس أحد..ولا الذئب ينقض على الحمل
ولا الكلب المتوحش على الجدي..ولا الخنزير البري يلتهم الزرع
حيث لا أحد يعرف رمد العين..ولا أحد يعرف آلام الرأس
حيث لايشكوالرجل من الشيخوخة..ولا تشتكي المرأة من العجز
حيث لا وجود لمنشد ينوح..ولا لجوال يعول…
بالجنة الموصوفة كان بيعيش الاله أنكي اله الماء العظيم ومرتو ننخرساج اﻷرض اﻷم عناة..رخى أنكي مياهه ليسقي تربة مرتو..فتحولت أرض الشمس لجنة الاهية خضرا من اتحاد الماء أنكي مع التربة ننخرساج وهيك اتملت الجنة الفردوس بالبساتين الخضرا والفواكه وظهرت مجموعة من اﻵلهات النباتية ..واجا أنكي أغواهن وترك مرتو وأهملا (تفسير لظاهرة يباس العشب والحشائش وظهور نباتات غيرها وتعاقب مواسم الخضرة والنباتات )..و ننخرساج اللي غضبت كتير..قامت بخلق 8 أنواع من النباتات العجيبة وقبل ماتفرح بعملها اللي أنجزته ..بيبعت أنكي رسوله عزموند (الريح القوية االي بتشلع النباتات والأشجار وبترميها بالانهار ) بيقطفلو النبتات العجيبات التمانية وبياكلن أنكي..ولمن بتعرف ننخرساج باللي صار فبتغضب كتير وبترمي على أنكي تعويذة لعنة مقيمة..” بتقول اللعنة : إلى أن يوافيك الموت لن أنظر إليك بعين الحياة “…وبتحرد وبتختفي وبتغيب عن اﻷنظار..لكن مجمع اﻵلهة بيخافوا من اﻷمر اللي صار لأنو هاللعنة على اﻹله أنكي بتعني شح بالمياه وغوصها تدريجيا لباطن اﻷرض ..وبيحتاروا كيف رح يعالجوا هالمشكلة وخاصة إنو ننخرساج رمت لعنتها على أنكي واختفت حتى ما تغير رأيها أو تخضع لضغط من اﻵلهة (عافكرة ننخرساج كتير بتشبهنا نحنا النساء السوريات لمن منزعل منحرد ومنختفي بشي مكان منشان ماحدا يأثر علينا ويغيرلنا رأينا ).. ” طبعا اللعنة هي تفسير للقحط والتصحر والجفاف اللي بيصيب اﻷرض “..
منرجع ﻷنكي إله الماء المسكين اللي بيشتد عليه المرض وبتصيبو 88 علل بعدد النباتات العجيبة اللي أكلهن وبلش جسمه يضعف وينهار ويغور باﻷرض تدريجيا..
وأخيرا بيجي الثعلب (المصلح الحكيم ) بينقذ الموقف وبيتبرع انو يدور على ننخرساج ويقنعها تطلع من مخبأها وبيلاقيها .وبتغير رأيها ﻷنها طيوبة وفورا بتنسى..وبتخضع لمشيئة مجمع اﻵلهة وبتوافق على شفاء أنكي عن طريق خلق 8 آلهة نباتية وكل إله بيختص بشفاء عضو من أعضاء أنكي العليلة وهاﻵلهة هنن ( اﻷرز..الصنوبر.. الكينا.. الزيتون..التين..الشوح..الخرنوب..الصفصاف ) وهاﻷشجار مهمتن تعقيم وتطهير و شفاء الماء والهواء من كافة اﻷوبئة والجراثيم واﻷمراض…
بتقول ننخرساج هي وعم تعالج أنكي :
شو عم يوجعك يا أخي.؟..
بيقول أنكي: فكي عم يو جعني..
بتقلو ننخرساج: خلقتلك اﻹله ننطول..
.شو عم يوجعك ياأخي..؟.
ضرسي عم يوجعني..
خلقتلك اﻹله. ننسوطو…
شو عم يوجعك ياأخي . ؟
عم يوجعني ضلعي..
خلقتلك اﻵلهة ننطي……..
وانتي يا أخي السوري..بتعرف شو عم يوجعك وبتعرف آلهة العلاج اللي بتشفيك …وبعرف قلبك الطيب فورا بينسى وبيعالج وبيشفي الجراح ..ياللا شحدني كلمة حلوة ومدلي ايدك خلينا نكون سوا نبني الجنة سوا …. لتعيش سوريا…وتحيا سوريا..
حكاية الاله أنكي اله الماء العظيم واﻵلهة ننخرساج # باسطورة الخلق والتكوين بحكايا التراث السوري القديم حكاية الاله أنكي اله الماء العظيم واﻵلهة ننخرساج ..عناة اﻷرض اﻷم ….بتبدا الحكاية بوصف للجنة أرض الشمس اﻷرض الطاهرة بلاد الشام – Manal Zaffour
من almooftah
