تويت
بعدِ البـَلـَدْ ما في وَلـَدْ
يـَ بـْني البلد ..
هيـّي الأمانـِهْ الغاليـِهْ
هيـّي الهـَنا ..
.. هيـّي الرِّزِقْ والعافيـِهْ
هيـّي الأخـُوِّهْ والمـَحـَبـِّهْ الـْجامـْعـَهْ
شوفِ الأعادي كيفْ فيها طامـْعـَهْ
وَحـْياةْ ألله يـَ الـْوَلـَدْ ..
.. هادي البـَلـَدْ أحسـَنْ بـَلـَدْ
فيها المـَحـَبـِّهِ مـْوَحـِّدِهْ ..
.. روحُ وْ جـَسـَدْ
شـُوفِ الـْكـَنايـِسْ بالصـَّلاةِ الخاشـْعـَهْ
وْ تـَكبيرْ يـِصـْدَحْ من صدورِ جـْوامـْعـَا
كـُلـُّنْ لـَبـَعـْضـُنْ ..
.. والمـَحـَبـِّهْ جامـْعـَهْ
كـُلِّ القلوبِ بـْنورْ ألله دافـْيـِهْ
يـَ بـْني ..
.. إنـِتْ رجـّالْ
يـَ بـْني الأمانـِهْ صـَدَّعـِتْ لـِ جبالْ
لا تـِسـْمـَعِ لـْسانِ الغـَدِرْ شو قالْ
يـَ بـْني البـَلـَدْ ..
حـُبـّا مـِنِ الإيمانْ
يـَ بـْني البـَلـَدْ وجـْدانْ
عنوانْ للإنسانْ
يـَ بـْني بـَلـَدنا ..
.. مـَهـْبـَطِ الأديانْ
يـَ بني بـَلـَدنا ..
.. صـَنـْعـِتِ الأزمانْ
يـَ بـْني البـَلـَدْ منْ بـَعـِدْها ..
.. ما في حـَكي بـْ يـِنقالْ
يـَ بـْني البـَلـَدْ ..
.. عرضُ وْ شـَرَفْ
مـَهـْما النـَّسـَبْ فيها خـْتـَلـَفْ
مهما الوجوهِ تـْلـَوَّنو وِتـْنـَوَّعو
وْ مهما بـْ أرِضـْها تـْفرَّقو وِتـْوزَّعو
لو يومْ قلبا بـْضيمْ ..
.. منْ جـُرحو نـَزَفْ
كـُلـُّنْ لـَ دَفـِعِ الضـّيمْ رَحْ يـِتـْجمـَّعو
وْ عنْ أرِضـْهـُنْ ..
.. عنْ عرِضـْهـُنْ بـِ يـْدافـِعو
وبـْ يـِطـْرُدو الأنـْدالْ
وبـْ يـِرفـَعو الرَّاياتْ حـُرَّهُ وْ عاليـِهْ
يـَ بـْني البـَلـَدْ ..
.. أغلى أمانـِهِ بـْرَقـْبـِتـَكْ
خـَلـّي الأمانـِهْ فوقْ كـُلشي بـْ عـِهـِدتـَكْ
يللـَّهْ يـَ إبني..
.. قومْ وعدَكْ حقـِّقو
فيكِ الرّجاوي اليومْ ..
.. عمْ يـِتـْعلـَّقو
تـْوَكـَّلْ عـَ ألله يا بطلْ
فيكِ الرّجاُ وْ إنتِ الأملْ
هلـَّقْ إجا وقـْتِ العملْ
يللـَّهْ يـَ إبني اليومْ وَعدَكْ حـَقـِّقو
وْنيشانْ أبطالِ الفـِدا
عـَ مـْراحْ صدرَكْ عـَلـِّقو
يـَ بني بـْلادَكْ فوقْ كـُلشي غالـِيـِهْ
قـَلاّ يـَ إمـّي ..
.. الحـُرْ يوفي لو وَعـَدْ
ما بـْخالـِفـِكْ يا مـِيمـْتي
واللـــ~ـــهْ بـِ عـْيوني البـَلـَدْ
غـَصـِّتْ بـِصـِدرو حـَرقـِةِ فـْراقا
وْ حـَبسـِتْ جفونو دموعْ حرّاقا
نـْشـَللـّهْ يـَ إبني بـْ تـِرجـَعُ وْ منصورْ
رافـِعْ جـِبينـَكْ فوقْ ..
.. شـُعلـِةْ نورْ
وَيـْلي ..
.. يـَ وَيلِ الأمْ شو بـْ تـِحمـُلْ ألمْ
وَقـِتِ اللـّي مـُهجـِةْ قلبها أمـرو حـَسـَمْ
بـْ لـَحـْظـِةْ وَداعو العـِزْ بـِ عيونا رْتـَسـَمْ
وْ مابينْ عـِزِّةْ فـَخـِرْها ..
.. وْ ما بينْ غـَصـِّةْ قـَهـِرْها
لـِ فـْراقْ مـَزَّقْ صـِدرْها
وْ قـَلبا ..
.. بـِ صـِدرِ مـْلـَوَّعِ تـْنينِ قـْصـَمْ
واحـِدْ على فـْراقِ الإبـِنْ مـَكسورْ
وْ واحـِدْ على حالِ البـَلـَدْ مـَقـْهورْ
وْ تا يـْعودْ لـَ حـْضانا الوَلـَدْ
وْ تا تـْزولْ غيمـِهْ نـَكـَّدِتْ قلبِ البـَلـَدْ
نـَدْرِتْ لـَ أللهْ نـْدورْ
نـَدْرِتْ وهيـّي عارْفـِهْ
إنـّو تـَ يبقى هـَ البـَلـَدْ منصورْ
حـُرُّ وْ هـَنيُ وْ مـَعـْمورْ
إبنا الغالي ..
.. لـَ الوطنْ مـَنـْدورْ
ما بـْ إيدْهاُ وْلا بـْ حـِيلـِتا
إلاّ دموعِ عيونْ حـَرَّهُ وْ حامـْيـِهْ
وْ تـَ يـْعودْ إبنا ..
.. عـَ الدَّعاوي باقـِيـِهْ
بـَعدِ اللـّي إبناراااحْ عنها وِبـْتـَعـَدْ
بـْ لـَحـْظـِةْ وَعي
صاحـِتْ وقالـِتْ ..
.. يا وَلـَدْ
يا روحْ روحيُ وْ مـُهجـِتي
يا حـَرْقـِتيُ وْ يا لـَوعـِتي
يا فرحـِتيُ وْ يا بـَسمـِتي
يا غـَصـِّتي ..
.. يااا هـَ الوَلـَدْ
لو راحْ يا إبني البـَلـَدْ
ما يـْعودْ إلنا بالدِّني قوِّهُ وْسـَنـَدْ
بعدِ البـَلـَدْ ..
.. همُّ وْ أسىُ وْ ظلمُ وْ نـَكـَدْ
وْ ما يـْعودْ أمْ تـْفرِّحا فـَرحـَهْ بـْ وَلـَدْ
الله معكْ الله معكْ ..
.. يا هـَ الوَلـَدْ
= تمـــ14/2011ـــوز = جميع الحقوق محفوظة لناظمهاعبـّاس سليمان علي =