إعـــــــلان

تقليص
لا يوجد إعلان حتى الآن.

جــــرجي وبالعالي بيروت

تقليص
X
تقليص
 
  • الصفحة لـ 1
  • تصفية - فلترة
  • الوقت
  • عرض
إلغاء تحديد الكل
مشاركات جديدة
السابق template التالي
  • #1

    جــــرجي وبالعالي بيروت

    هذه القصيدة منقولة من موقع dai3tna.com وهو موقع مرمريتا
    وهي من تاليف الدكتور اياد قحوش وقد احببت ان اهديها لجميع الاعضاء
    إنت ورايح من ضيعتنا

    بآخرها بتلاقي عَين

    عَ جبينا بتعرّم صخرة

    مكتوب عليها إسمين

    جــــرجي
    وبالعالي بيروت




    بو جرجي

    بيّو لجرجي

    ختيار وإيدو مقطوعة

    سكّير مداوَم عالشّرب

    وعَ طـــول الكاسة مرفوعة

    ومين المابيعرف بوجرجي

    وكلّ حكاياتو مَسموعة

    صيّاد كبير

    ومشهور

    مرة صَيّـد تسع نسور

    ومرة اصطاد تلات نمور

    ومرّة استوحَش

    هيك بيحكوا عنه مَرّة

    صَيّـد ضبعة ولَبوة ونمرة

    ونسور المانا معدودة

    وفجأة
    خانيتو البارودة

    وانفجرت

    واحترقت إيدو ...

    وانقطعت

    بيقولوا

    مابكيت عينو

    سلّـى حالو بغنيّـة

    بيقولوا

    إيد المقطوعة

    دشّـرها بالبرّية

    ****

    ومن يوما

    بو جرجي اتغيّـر

    قفّـل عَ بواب الإحساس

    بلّـش يسكر

    خمس ســنين

    وما دشّــر من إيدو الكاس

    دشّــر مرتو

    وإبنو

    وبيتو

    دشّـر رفقاتو والناس

    وما بعّـد عن تمّـو الكاس

    اتمنى واحد من ضيعتنا

    يشوفو شي مرّة واعي

    اتمنى يشوفو ممشّـط شعرو

    مرّة

    ونضيف الأواعي

    صار الخمر يخاوي دمّـو

    يفيّق بعيونو النسيان

    وسَكرة صحيانة

    تهمّـو

    وترميه

    ويبقى نعســـان

    عندو الكاس بيسوى قلعة

    ما عندو أغلى من البَلعة

    ****

    ويوم الجمعة

    تسعة حزيران الأسود

    من عام تنين وتمانين

    بتوقَف سيارة بالضيعة

    بتسأل

    عن بو جرجي
    وين

    ترجّـل ضابط عَ كتافو معلّق نجمين

    ونادى : يـــــا بو جرجي

    وبو جرجي مطنّـش سرحــــان

    ردّ .. وقلّـو :

    يابو جرجي

    إبنك جرجي مبارح كـــان

    عَ صدر الجبهة

    نيشان

    إبنك جرجي مبارح

    غنّـى

    خلّـى جبال النار تهزّ

    بــاس الأرض وضمّـا

    وحنّـى بدمّـو تراب حفاف العزّ

    إبنك سيف مدافع عَنّـا

    رمْح بصدر العادي انغـزّ

    إبنك قلعة مَـجد

    وأعلى

    وعليانة عَ كتاف الريح

    وعَ مدخل بيروت

    اتجلّـى

    مارد أسمر مــا بيزيح

    إبنك شبّـاك مراجيح

    توَدّي وتجيب عصافير

    بموجة نور

    بموجة عزّ

    بموجة ياسمين وجرجير

    يعني

    نحنا كنا زغار

    ووحدو إبنك كان كبير

    ****

    بيقولوا

    بو جرجي وقتا

    بلّـش يرجف متل اللمعة

    بيقولوا

    هي أول مرة

    بتنزل من عينيه الدمعة


    وقـّـف

    هَـمهَـم

    غَـمغَـم

    زَمجَر

    كفـّـو تصلّـب

    زندو تحَجـّـر

    شفافوا انمدّوا

    عيونوا اتحدّوا

    فزّع كلّ الكانوا حدّوا

    وبلـّـش يزأر

    ويصيــــح بها العالي ويهدُر :

    جرجـــي إبني
    جرجـــي عيوني
    جرجي يمـــوت

    قالولي ما اتجوّز إبنك
    هي هوي اتجوّز
    بيروت

    ****

    ومن يوما بو جرجي غاب

    واحد بس
    المَرّة شافو

    بنصّ اللّيل
    وحَـدّ العين

    سطـّـر عَ صخورا إسمين

    جــــرجي
    وبالعالي بيروت

    ****

    وما عرفنا بو جرجي وين

    إلا وبتمرق سنتين

    بيحكيلي ضابط لبناني

    عن ختيار كبير السّــن

    مدفوع ومقطوع الإيد

    شــافو عم يزحف لبعيد

    صــوب الجيش الإسرائيلي

    والدّنيا شي إنـّـو صبح

    وفجأة وقـّف متل الرمح

    وجندل ستة بسيفو

    وغنـّـى

    جايي يا جرجي استقبلني

    رح تبقى الرّاية مرفوعة

    السّـكير اللي إسمو بيـّك

    طـفـّى بدمـّو الأرض وجوعا

    ولما بيناديه الواجب

    من سابع سكراتو بيوعا

    الكلمات الدلالية (Tags): لا يوجد
  • #2
    رد: جــــرجي وبالعالي بيروت

    هادي القصه موسوعه
    لو نِعقَلْ فيهاُو نـُوعا
    منها عبره بـْ ترشدنا
    وْمنـّاُ وْ إلنا مرجوعا
    الـْ بيضحّي لو بدّو يـْضحّي
    فيه يضحّي بـْنفسو بـْذاتو
    بتـْيابو بـْ بيتو بـْ خبـْزاتو
    بجروحو بـْ خمرو بـْ كاساتو
    لِمـْهمْ يـْضحّي من ذاتو
    ماهمّو شكْلا أونَوعا
    يبقى جبينو ناصع عالي
    عندو يرخصْ كلِّ الـْ غالي
    وقت الـْ بيناديه الواجب
    ما في داعي حتي ينادي
    ماشي ـ زاحف ـ طايرْ راكبْ
    صدرو نارْ رْصاصو لاهبْ
    ماهمـّو بالرّوح طلوعا
    ماهمـّو مرتو وأولادو
    ولامالو ولا أكلو وزادو
    ولا همّو أمّو ودْموعا
    همّو الإمّه تـْشقِّ الظلمهْ
    همّو الكلمهْ تنيرْ شْموعا
    همّو الرّاياتْ الخفـّاقهْ
    أعلى مـْنِ العالي مرفوعهْ
    همـّو الحاضرْ همـّو الماضي
    همـّو الكلْ بعيشو راضي
    دمـّو ما بـْيسرحْ عالفاضي
    لو بيضحي الـْواحدْ مِنـّا
    تا تْضلْ الكلمهْ مسموعهْ
    والأمـّه تتهنـّأ بعيشا
    عالعِزّهْ رح تغفا و توعا

    تعليق

    • #3
      رد: جــــرجي وبالعالي بيروت

      والله يا أخ نبيل لو بس في شي كام واحد متل بو جرجي كانت الدنيا بألف خير.... قصيدة جميلة كتير وفيها من العبر -لمن يعتبر- الكثير الكثير...سلمت يداك وسلمت يدا الأخ عباس على هذه القريحة الشعرية الرائعة...

      تعليق

      • #4
        رد: جــــرجي وبالعالي بيروت

        شكرا للاخ عباس على هذه المعلقة, تعجز الكلمات عن وصف شعوري بعد قراءتي لشعرك, اخاف ان احاول ان اكون فصيحا فلا اوفيك حقك
        شكرا لك و وفقك الله.
        الاخت ردينة كل مواطن شريف برأي هو بو جرجي و كل يدافع عن الوطن بطريقته وعلينا ان نجدهم ونساعدهم

        تعليق

        • #5
          رد: جــــرجي وبالعالي بيروت

          موفق باختيارك يا صديقي الغالي صديق الطفولة والصبا نبيل ومشكور على هذا الشحذ لهممنا وتفكيرنا
          ولا ننسى إن نسينا الأخ عباس أستاذنا وشاعرنا المُجيد فمساهماته تتكلم عن ذاتها بذاتها

          تعليق

          • #6
            رد: جــــرجي وبالعالي بيروت

            لو كنت اشكر او اكافئ على قول الصدق والاعتراف بالحق لشكرت ولكافأت ولكن ليس عندي إلا المودة وآيات الاحترام

            تعليق

            • #7
              رد: جــــرجي وبالعالي بيروت

              الاخ عباس و لكم منا بعضا مما عندكم, المحبة و كل الاحترام . دمت صديقا

              تعليق

              السابق template التالي
              يعمل...
              X