سورية وطني الأول. ووطن البشرية الثاني


بحبّك أنا ..
قدّيش ؟..
عَ قدّ ما هيي عتيقة الشام
وعَ قدّ ما من ترابها سكبو دهب
عَ قدّ ما نسجت حلب أحلام
وعَ قدّ ما في غار بقلعة حلب
بحبّك أنا .. قدّيش ؟..
عَ قدّ ما في بحمصنا مواعيد
وعَ قدّ ما العاصي من دموعا شرب
عَ قدّ ما في بتدمر عواميد
وعَ قدّ ما التاريخ بِـ رملا انكتب
بحبّك أنا .. قدّيش ؟..
عَ قدّ ما الأبيض غسل طرطوس
وعَ قدّ ما عرسان طلبو أيدها
عَ قدّ ما اللاذقية عطتنا دروس
من حرفها وانسانها وتغريدها
بحبّك أنا .. قدّيش ؟..
عَ قدّ ما التاريخ بأدلب
مغطى بزيتون وسما
عَ قدّ ما جرّب كذا مطرب
يقلّد الناعورة بـ حمـا
بحبّك أنا .. قدّيش ؟..
عَ قدّ ما في رِقـة بالرقـة
وعَ قدّ ما بيعبد فراتو الدير
وعَ قدّ ما في سمك بالطبقة
وعَ قدّ ما الحسكة أرض للخير
بحبّك أنا .. قدّيش ؟..
عَ قدّ ما الجولان بِـ بالي
لحضن الوطن مشتاق
وعَ قدّ ما أنطاكية غالي
هيي وكسب عشّاق
بحبّك أنا .. قدّيش ؟..
عَ قدّ ما في سهول بدرعا
وعَ قدّ ما في بالجبل تفّاح
وعَ قدّ ما في ناس مجتمعة
تبكي الوطن .. وتدعيلو بالأفراح
ولك .. بحبّك أنا ..
وعم تسأليني ليش ؟..
ولك .. سوري أنا ..
وعم تسألي قدّيش ؟..

ابو عيسى ـ يتبع