‏فاطمه المرسي‏
إيش جاب لجاب !!
...............................
فى الفجر أرمي الشبك
وأدعيله بالتساهيل
واغلب سكوت وحدتي
فى البحر بالمواويل
موال يجيب القمر
ونجوم حواليّا
موال يخلي السمك
يرقص على الميَّه
موال يفرفط حنين
على موجه يشجيها
تنزل دموعها درر
فوق الشراع قناديل
يلم تاني الشبك
فى الصبح موالي
ودموعها تفضل كده
قناديل على بالي
واقول لنفسي يا ناس
فيه موجه بتعيط ؟!
دي أميره من حقها
ع البحر تتشرط
تفرد جناحها
تزور الشط أو ترفض
تقدر تخلي السمك
ع الشبكه مايردش
وبنظره من رمشها
حضن الشبك يفرش
طبطبت على كتفها
نامت على شالي
ونسيت حكاية السمك
واني أنا الصياد
والبحر غدار مالوش
صاحب ولا أحباب
صاحبت غدره عشان
أضحك عليه واصطاد
ضحك السمك فى الشبك
قال الجدع غلبان
الحب شبكُه ونسِي شبكُه
وبات سهران
غُلُب حمارُه ورمى شاله
عشان دَمعه
وحبيبته من مكرها
أهي عامله مش سامعه
وانا اللي قلبي هوى
ولعب بعقلي الريح
والبر من عشقها
بيئن بالمجاريح
مش شايفه غير نفسها
ولا همَّها حالي
نامت عيون سِرَّها
والسر له رجلين
وصبحْت تايه ومش عارف
منين أروح على فين
أتاريها عاشقه القمر
وانا اللي مش داري
صياد غريمي القمر
وبشاركه موالي !
واهي عايشه تستنظره
وحياتها جزر ومد
دايب وفي عشقها
قلبي انكوى م العد
ورسيت على برَّها
أصل الهوى غلاَّب
وانا قلبي نورس يتيم
وماخدش بالأسباب
قمر وصياد سمك
وايش جاب ياقلبي لجاب

..................................
فاطمة المرسي