تويت
ياشجرةِ الخوتان
يا شجرة الأعياد ..
.. ليشِ مـْزيـَّنهْ ..!!
أنوارْ ملفوفهْ عـَ بعضا مـْلوَّنهْ
بـْتستـَبشري بـْعامِ اللـّي آتي مـْنجـْهـَلو ..!!
واللاّ تـْزيـَّنتي لعامِ اللـّي مضى ..
.. تا تـْودِّعي
لـْبستي الحلا وباللـَّونْ صرتي تـْشعشـِعي
لـِكْ وينْ بـِتـْروحِ السـِّنهْ ..!!
رحْ تنتهي بـِ وْراقْ ذاكرةِ الدِّني
بـْ أيامها اللـّي مـُفرحهْ ..
.. وْ أيامها اللـّي مـُحزنهْ
وْ تـِبكي عليها وتـِحزني
ومنْ بعدها ..
..بـِقبورْ ذاكرةِ الزَّمان الموحـِشهْ
كلاّ عـَبعضا تـِدفني ..!!
عم تفرحيُ وْ تتـْزيـَّني ..!!
وْ لكْ راحْ من عمرِكْ سنهْ
عم تفرحي راحتْ سنهْ ..!!
.. واللاّ لأنـُّو جايْ تـَتـْروحِ السنهْ ..!!
ليشِ الدِّني ..
.. لو كان ماتتْ شي سنهْ
وْ من بعدها رجعتْ سنهْ
بـْ تتـْغيـَّرِ حـْزانِ الدِّني ..!!
بـِ تـْرجـِّعِ الأعمارْ حـَدِّ الولدَنهْ
يا شجرةِ الخـُوتانْ ..
.. لا تتـْزيـَّني
عمْ تفرحي ..!!
وْ لكْ راح من عمركْ سنه
وهـَ العامْ يللـّي جاي ..
.. لاحـِقْ هـَ السنهْ
هيكِ الدِّني
كلِّ السنينِ بـْ قبلها كانتْ سنه
وْ من بعدها بـْ ترجع سنهْ
هيكِ الزمنْ دوَّارْ
عمْ يطحنِ الأعمارْ
وْ نحنا اللـّي كنـّا صغارْ
شـْقدِّ بـْ عمرنا تـْ زيـَّنو أشجارْ
وْ من بعد صرنا كبارْ
مـِنـْزيـِّنِ الأشجارْ
لـَ وْلادنا لـِ صغارْ
وْ طاحون أيام العمرْ دوَّارْ
وْ كلْ يوم ياكـُلْ ..
.. من عمرنا نـْهارْ
وْ نـُغزلْ فرحْ ..
.. لو ماتتْ وْراقِ السنهْ
وْ بعدو فرحْ ..
.. لـَ وْراقْ من تاني سنهْ
وْ إنتي الزّينهْ لابسـِهْ ومـْزيـَّنهْ
من هـَ السنهْ ..
.. للـْ جاي من تاني سنهْ
= عباس سليمان علي =
تعليق