Tweet
في حب مصر
يا مصر حبك ليه
في القلب له بصمة
ويسيب فراقك وجع
وأحس قلبي اتخلع
مِ الوحشة والضلمة
يا ام الهدوم البيض
والطرحة محتشمة
يا ام الحلق في ودان
ألوانه منسجمة
يا ام العيون السود
قادرة ومحتكمة
لما قصاد النيل
ألاقيكِ في المواويل
سارحة مع النسمة
وأبصّلكْ بعنين
هايمة مع الهايمين
أشتاقلك بضمّة
عطشان لروحك أنا
أدّيني لو كلمة
وتعالي نتوشوش
نفضفض ونتْفشّش
في السر .. في العتمة
لو قرّبتْ ودنِك
مني أخذ شمة
يا مصر يا جنة
يا مصر يا أمّة
علمتِ أولادك
الأنس واللمة
الله عليك يا مصر
بين البلاد نجمة
لما يغيب النور
وييجي علينا الدور
تكشف لينا المستور
وتلملم الغمة
مصر اللقا والشوق
والحب والبسمة
والنيل في نص الليل
والناس بقت نايمة
ينده على العشاق
وقلوبهم الهايمة
سيبوا التعب يا ولاد
سيبوا السما غايمة
وتعالوا دفوني
وتخبوا في جفوني
مِ الخنقة والزحمة
أنا بعرف اجدادكم
واعرف مراكبكم
من يوم ما كان بيتكم
بيقسّم اللقمة
بينه وبين أهله
وفقير بتندهله
كان بيت هدى ورحمة
مصر اللي فوق الفوق
عايزة العيال سالمة
لو كان جمع البشر
عد النجوم والشجر
فوق السحاب قايمة
أنتو يا مصريين
يا ولاد يا منتصرين
فوق النجوم نجمة
Comment