تويت
"هات لي مصر معاك يا بابا" قصيدة لسعيد حامد شحاتة
الشاعر سعيد حامد شحاتة
- مصر يعنى إزاى يا بابا؟!
- مصر: يعنى النيل وتنهيد الربابه
مصر يعنى أنا وانتِ والناس الغلابه
مصر يعنى...
اتنين على شط الأمل دايبين صبابه
مصر يعنى سؤال ماهوش محتاج إجابه
مصر يعنى كتابه مش زى الكتابه
مصر يعنى الفرحه فى جبين الكآبه
مصر يعنى كلام نبى وتصديق صحابه
مصر يعنى الضرب فوق راس الديابه
يعنى غابه وثورجيه
يعنى شاى على راكيه وزناد بندقيه
يعنى دقّة زار وصحن مهلبيّه
يعنى عدس ف عزّ طوبه...
ومستكه وحلّة فوليّه
يعنى صبر جِمَال وضربة مدفعيه
يعنى خيل رمّاح وكرباج عربجيّه
يعنى ستّ مهندمه وقادره وعفيّه
يعنى راجل قلبه مخنوق م القضيه
م الكلاب الدايره تنبح فى الوسيّه
م السكات والفقر والجتت الرديّه
مصر يعنى النكته فى اللحظه العصيّه
يعنى ريحة الحب فى حيطان الغوريّه
مصر يعنى الفتْوَنه وضرب الرُّوسيّه
يعنى دفتردار وخوجه وبصمجيّه
يعنى حتّة خرْقه...
من صدر البنات للشكمجيّه
مصر..........................
مصر يعنى النيّه أصفى من الحليب
يعنى صوت ثومه وإمام والعندليب
يعنى دعوة أم ومشنّة غريب
يعنى غيط وكانون وغلّه...
ومدرسه وقَطْْر وقضيب
يعنى كيلو حلاوه..
من سيدى إبراهيم... واتنين زبيب
يعنى شِعر ومدنه وكنيسه وخطيب
يعنى طاقة نور فى كراسة أديب
يعنى كفّ..
بينفرد لزميله فى الوقت العصيب
يعنى أم...
مآمنه -دايما- بالقضا وحكم النصيب
مصر..........................
مصر يعنى وشوش تغيب،
ووشوش تجيب ضحكة نهار
يعنى ترتيب الوجع جنب الهزار
يعنى بنت...
بتترعش بالليل على فَرْش الخُضار
يعنى كيلو ملوحه وشكارة خيار
يعنى دعوه وبسمله وليلتين حصار
يعنى ضحكة حب فى قلوب الصغار
مصر يعنى عيار ما يشبهش العيار
يعنى تار ابن أمى لو بات يبقى نار
يعنى طالعين..
بالزلط والطوب على كلاب التتار
مصر..........................
مصر يعنى شعار
ومعنى
وفرحه
وشوية كلام
يعنى فرن القش...
والمقْلايه والزير والبِرام
يعنى قلع ومركبه وبرجين حمام
يعنى تشط نحاس..
وإبريق للإمام
مصر يعنى كوزين أمل وقيراط سلام
يعنى لما ننام..
ننام والقلب صافى
يعنى واد فى الحاره حافى
يعنى تيار كهربا...
-ف عزّ الشتا- معاند وطافى
يعنى خد حبيبتى نعسان فوق كتافى
يعنى لما تخافى بالليل م الغيلان
يعنى فول وشعير ومانجا وبرتقان
يعنى شُقةْ عيش طرى...
وكبْشَه وحِفان
يعنى خطوة عسكرى تهز الميدان
يعنى صوله وصولجان.
- هات لى مصر معاك يا بابا!
- مصر مش برّايه وفيونكه وحصان
مصر مش معجون سنان
مصر مش توكه وقلم وبصاغ لبان
مصر حبة حب وشوية إيمان
مصر دقّة قلب بترُج الميدان
مصر إيد فنان وخط أمان ودانه
مصر راس مرفوعه مش قابله الإهانه
مصر جيبنا الفاضى وبطوننا الجعانه
مصر قصر كبير وتحويطه وخزانه
مصر قلب يطب فوق كفّة ميزانه
مصر كشف إدانه فى وشوش الكلاب.
- هات لى مصر معاك يا بابا!
- مصر مش فستان قطيفه...
وطرحه وشوية تياب
مصر مش شنطة كتب...
ولا مسطره وجيبه وشراب
مصر مش درس إنجليزى...
ومدرسه وكفته وكباب
مصر يعنى الورد والشوك والصحاب
مصر يعنى يومين عسل ويومين هباب.
- هات لى مصر معاك يا بابا!
- مصر مش دفتر حساب.
الشاعر سعيد حامد شحاتة
- مصر يعنى إزاى يا بابا؟!
- مصر: يعنى النيل وتنهيد الربابه
مصر يعنى أنا وانتِ والناس الغلابه
مصر يعنى...
اتنين على شط الأمل دايبين صبابه
مصر يعنى سؤال ماهوش محتاج إجابه
مصر يعنى كتابه مش زى الكتابه
مصر يعنى الفرحه فى جبين الكآبه
مصر يعنى كلام نبى وتصديق صحابه
مصر يعنى الضرب فوق راس الديابه
يعنى غابه وثورجيه
يعنى شاى على راكيه وزناد بندقيه
يعنى دقّة زار وصحن مهلبيّه
يعنى عدس ف عزّ طوبه...
ومستكه وحلّة فوليّه
يعنى صبر جِمَال وضربة مدفعيه
يعنى خيل رمّاح وكرباج عربجيّه
يعنى ستّ مهندمه وقادره وعفيّه
يعنى راجل قلبه مخنوق م القضيه
م الكلاب الدايره تنبح فى الوسيّه
م السكات والفقر والجتت الرديّه
مصر يعنى النكته فى اللحظه العصيّه
يعنى ريحة الحب فى حيطان الغوريّه
مصر يعنى الفتْوَنه وضرب الرُّوسيّه
يعنى دفتردار وخوجه وبصمجيّه
يعنى حتّة خرْقه...
من صدر البنات للشكمجيّه
مصر..........................
مصر يعنى النيّه أصفى من الحليب
يعنى صوت ثومه وإمام والعندليب
يعنى دعوة أم ومشنّة غريب
يعنى غيط وكانون وغلّه...
ومدرسه وقَطْْر وقضيب
يعنى كيلو حلاوه..
من سيدى إبراهيم... واتنين زبيب
يعنى شِعر ومدنه وكنيسه وخطيب
يعنى طاقة نور فى كراسة أديب
يعنى كفّ..
بينفرد لزميله فى الوقت العصيب
يعنى أم...
مآمنه -دايما- بالقضا وحكم النصيب
مصر..........................
مصر يعنى وشوش تغيب،
ووشوش تجيب ضحكة نهار
يعنى ترتيب الوجع جنب الهزار
يعنى بنت...
بتترعش بالليل على فَرْش الخُضار
يعنى كيلو ملوحه وشكارة خيار
يعنى دعوه وبسمله وليلتين حصار
يعنى ضحكة حب فى قلوب الصغار
مصر يعنى عيار ما يشبهش العيار
يعنى تار ابن أمى لو بات يبقى نار
يعنى طالعين..
بالزلط والطوب على كلاب التتار
مصر..........................
مصر يعنى شعار
ومعنى
وفرحه
وشوية كلام
يعنى فرن القش...
والمقْلايه والزير والبِرام
يعنى قلع ومركبه وبرجين حمام
يعنى تشط نحاس..
وإبريق للإمام
مصر يعنى كوزين أمل وقيراط سلام
يعنى لما ننام..
ننام والقلب صافى
يعنى واد فى الحاره حافى
يعنى تيار كهربا...
-ف عزّ الشتا- معاند وطافى
يعنى خد حبيبتى نعسان فوق كتافى
يعنى لما تخافى بالليل م الغيلان
يعنى فول وشعير ومانجا وبرتقان
يعنى شُقةْ عيش طرى...
وكبْشَه وحِفان
يعنى خطوة عسكرى تهز الميدان
يعنى صوله وصولجان.
- هات لى مصر معاك يا بابا!
- مصر مش برّايه وفيونكه وحصان
مصر مش معجون سنان
مصر مش توكه وقلم وبصاغ لبان
مصر حبة حب وشوية إيمان
مصر دقّة قلب بترُج الميدان
مصر إيد فنان وخط أمان ودانه
مصر راس مرفوعه مش قابله الإهانه
مصر جيبنا الفاضى وبطوننا الجعانه
مصر قصر كبير وتحويطه وخزانه
مصر قلب يطب فوق كفّة ميزانه
مصر كشف إدانه فى وشوش الكلاب.
- هات لى مصر معاك يا بابا!
- مصر مش فستان قطيفه...
وطرحه وشوية تياب
مصر مش شنطة كتب...
ولا مسطره وجيبه وشراب
مصر مش درس إنجليزى...
ومدرسه وكفته وكباب
مصر يعنى الورد والشوك والصحاب
مصر يعنى يومين عسل ويومين هباب.
- هات لى مصر معاك يا بابا!
- مصر مش دفتر حساب.