قصيدة / علّمني تا إتْـعلَّمْ -1-/ للشاعر عباس سليمان علي..

[ياسمينة دمشق]

عباس سليمان علي


علّمني تا إتْـعلَّمْ
=======((1))=======
*- متل الْـأعمى والْـأبكمْ
لا تْـخلّيني إتوهَّمْ
متل الأطرشْ بالزّفِّـهْ
غافي واقفْ عالْـحفِّـهْ
لقِّـمْني نتْـفهْ ونتْـفهْ
*ـ وْ علِّمْـني تا إتْـعلَّمْ ـ*
*- علِّمْـني تا إتْـعلَّمْ
عَـالطّايرْ والله بفْـهمْ
علِّمْـني شي علّومهْ
لا تتْـركني موهومهْ
وْ لكْ بسْ بْـإيدكْ تومي
وبْـتطليعهْ مفهومهْ
أو بشْـفافكْ تتْـبسَّمْ
*ـ وحْياتكْ دغري بفْـهمْ ـ*
*- تْـأكَّدْ إني موهوبهْ
بسِّ تْـضوّيلي دْروبي
ترْجمْ فسِّرْلي مْـعاني
وْ فكْ الْـكاني من الْـماني
تركي فْـرنسي وْ ألماني
بالحبْ بْـغنّي غْـناني
بْـترْجمْ بِـحكي لهْـلوبهْ
*ـ وْ ما بدّي كْتاب مْـترْجَمْ ـ*
========((2))=======
*- بْـتعْرفْ إنّي زْغيّورهْ
حلوهْ كتيرُ وْ شطّورهْ
بدّي إنتْ تْـغنّجْني
تْـعلْمْني وْ ما تحْرجني
لا تْـدايقْني وْ تزعجني
وْ لا تْـعجِّلْ وتْـلهوجني
حلْوهْ بْـحالي مبهورهْ
أوعا تْـقلّي مغرورهْ
بخلّي روحكْ محرورهْ
*ـ بْـخلّيك تْـجنْ وْ تنْـدَمْ ـ*
*- بدّي تْـحقِّقْ آمالي
تْـحطِّلّي الكون قْـبالي
بْـحضنك بدّي تْـكبِّرْني
وْ ترجعْ بعدا تْـزغِّرني
طير لْـفوق وْ طيِّـرني
لاكنْ أوعا تْـعيِّـرني
تْـوقّا وْ أوعا يا عيوني
تْـقلّي خوْتهْ وْ مجنونهْ
والله بْـفرجيك جْـنوني
*ـ وْ خلّي قلبك يتْـألَّمْ ـ*
عباس سليمان علي ==