تويت
"هي قصيدة" جديدة لماهر مهران
ماهر مهران
مراية السّما
هي
زهزهة الورد فوق الأرض
هي
بيت الأوليا
وهي
نعومة ملمس النسيم للورد
هي
حضن فاير فى السقيع
وهي حلاوة الجنون
لمّا ينطلق م العقل ..
هي البطن اللي شال العدل ..
وهي الشفق اللي بينام فوق طراطيف النخيل
والبطة العايمة على وشك يا نيل
وجبنة رواها الزمن بالحمار
هي ملبن يتقطم قطم
وهي الأبيض م الحليب
والأطعم من الجّمار
وهي السّكرالدايب جوة سنابل القمح
هي شجرة فاكهة تقل عليها الطرح
وهي غواية الرسل
والخصوبة اللى ساكنة فى الحصى
وهي دلع الحروف
والشهامة وقت الخوف
والعيش والملح
وهي بت صعيدية
ع ترقص حافية على ضهرالزمن
هي لوزة قطن رشّوها بعطرالورد
هي مفتاح الجنة
وخزانة الأرض
وهي شمس فى الشتا دافية
هي السما الصافية
وحلاوة القصب
وبسمة العيال ع العتب
وريحة اللمون
وهي اللي من زمااااااااااااااااااااااان
نصبوّها ملكة جمال الكون
وهي بطنها
عجين قمح م الخمران
هي ريحة الرغفان
وهي صوت عبدالباسط
في ليل رمضان
وهي صوت حنون
تقولشى زبدة سايحة من خزانة المعبد
للكنيسة
لمقام الشيخ سالمان
وهي الحمرة زي زهرة الرومان
والسمرة زي الكحل
والبيضة زي نيتها
هي العطروالألوان
وهي مرسى الدنيا بعدالطوفان
وهي برتقان حادق
والكف اللي سابق
ومحور الأعجاز
هي الحكمة ماشية بالعكاز
والدلع لو تحضر
أخضر يابكرة أخضر
هي قمر في الملاية اللف ماشي يتمخطر
يلوحنا يلوحنا
يدوخنا مايروّحنا
هي عقلنا وروحنا
وهي دايما بهجة الشارع
وهي بنت القصور اللى ع تبص ع الأنهار
هي البطن
اللى مابتشيلش غير أحرار
وهي العنيفة أعنف من الأعصار
وهي نوّاربينوّرطول الفصول
هي لذة الحرف
وروعة الأرغول
وريحة العطارين
والخصوبة اللى ساكنة الحصى والطين
وهي
حريرفى الملمس
وهي
شجاعة أحمس
وهي المزيكا لما تمشي تتسرسب فى غيطى
هي الحياة لوتشرب معاك الشاي
وهي
شجن الناي
العود على الترعة
هي غزالة ع تتمرمغ في الزرعة
وهي
قمرة لو هلّت
هاتداوي المكفوفين م العمى
وهي
أرتكاز الأرض
ومراية السما