أخر الاخبار
أنت هنا: الرئيسية 2 منوعات 2 كتب Abderrahim Tourani عن حكاية السكرتيرة جميلة..

كتب Abderrahim Tourani عن حكاية السكرتيرة جميلة..

ربما تحتوي الصورة على: ‏‏شخص واحد‏، ‏‏‏‏جلوس‏، ‏لحية‏‏ و‏منظر داخلي‏‏‏‏

Abderrahim Tourani

حكاية السكرتيرة جميلة

هاي هاي هاي..
على دوخة على تْبَجْقيلَه
بْقيتْ ليكمْ غيرْ أنا واقيلا
آش هادْ الفوضى..
آشْ هادْ التْروبيله
كلشي دار فيها حقوقي حْنينْ..
مْسَيْكينْ..
بْقاتْ فيهْ السكرتيرة جميلة
أنا مومن وصدري عامر بكلام الله
حافظو ومرَّتْلو أحسن ترتيلا
شلُّو بها فّامْكم مْيات تشْليلة وتشليلة

زَمّي للخانزين فّامهم ديال الكابينة
كيف كنعاملك وكيف كنت كنبغيك يا جميلة
ما كنتش حاسبك عزيزة.. وحدة من الفاميلة؟


جميلة الله يغفر ليها بدات معايا من الزّيرو
ملّي كنت كندور
وداير شكارتي هي البيرو
صبرات معايا حتى مسّك عليا الله
ما كاين حنين منّان من غيرو
كنت كندوز النهار بكأس اتاي
وحك صغير طون ميرو
تعياو ما تجريو وتجاريو وتطيرو
ويجي من يفوز عليكم بنعاسو وشخيرو
وفضل الله بعضكم.. وما عندنا ما نديرو
جاب الله واستجاب واعطاني من نعايمو وخيرو
صبحت وزير وكيحسبو لي حساب خلى العديان كيحيرو
شي بطعريجة شي يزمر بالغيطة وشي محزم وشاد بنديرو

جددت فراشي شحال من خطرة وبدلت الطوموبيلة
والله يرحم أسلافنا اللّي فاتوا وما بدلوا تبديلا
نفعاتني السلكة ف الجامع يا ولد لهبيله
ماشي قرايت “مينة جولي مينة” ف السكويلة
قال الله تعالى وقال الرسول والفياق للصلاة كل ليلة
الله يلعنك يا تارك الصلاة وزايدها بتكشبيلة تيوليلة
السياسة نباصات وفعايل المطورين اصحاب الحيلة
البيجدي سوق كبير وحّدْ نْوايلْ لخونجية في قبيلة
اللّي كان مقلق وما حامدش الله.. زدناه من عندنا فيلة


جميلة ما كانتش تحمل لامتيال والضمان الاجتماعي
هذا تخربيق اللى خلقو ف اللّوْل سكايري شيوعي
جميلة ديما تقول عنايتي ف راسي وبين ضلوعي
والى كتاب على الكرش تجوع.. نقول ليها جوعي
كانت اختي وبنتي ومخبية اسراري وموضوعي
وأنت غير فضولي بركاك ملسوع بن مركوعي
شكون انت تجي تحاسبني وتطلب مني نهز قلوعي
بت هنا ننبت.. يا الضحكة يا ولد الجربوعي
ما كاينش اللّي يحرك فيا شعرة ويقلق من روعي
أو يقدر يوقف مسيرتي ويخربق طريقي وطلوعي

جميلة بوها اشهد وشهادتو دايزها الكلام
إيكاليزي جابت لبوكم ثلاثة وضامة والتمام
لاصينيص ما غادي يدخلني للجنة الأنعام
ما غادي يخرجني من نار الآثام
يا بنادم يا ولد بونا أدام
دير لفمك لجام
وقرونا شوية يا ولاد.. لحرام

اضف رد

لن يتم نشر البريد الإلكتروني . الحقول المطلوبة مشار لها بـ *

*