يوم قدم الشاعر السوري ( ‏عباس سليمان علي‏ ) – قصيدة بعنوان : عطرُ وْنضارهْ والحلا ألوانْ وْما بـْيشبهـِكْ تشرينْ ..- ســ 23/11/2014 ــورية

عطرُ وْنضارهْ والحلا ألوانْ
وْما بـْيشبهـِكْ تشرينْ ..
بسِّ بـْيشبهـِكْ نيسانْ
شو بـْيشبهـِكْ نيسانْ
ما بـْيشبهو متلـِكْ حدا
فجرو همسْ ..
بيقطّر حبوب النّدى
صبحو شمس
ضوُّ وْدفا ..
بـْتغمرْ بأحضانا المدى
متلـِكْ متلْ نيسانْ
عصافيرْ تغزلْ للعشقْ ألحانْ
مانـِكْ متلْ تشرين غدّارهْ
بين الشـِّتا والصّيفْ محتارهْ
بين الدّفا والبردْ عم تتقلـَّبي
ما بـْتعرفيْ بـْ أيّا المراكبْ تركبي
مرّهْ نسايمْ هاديهْ ..
صحوهُ وْسماكي صافيهْ
وْفجأهْ علينا بـْتعملي غارهْ
من قلبْ جوّاتِ الهداوهْ بـْتغضبي
يا حلوتي تشرينْ ..
متقلـَّبُ وْحيرانْ
ما بـْيشبهـِكْ تشرينْ ..
ربيانْ عـَ التـِّخمينْ
متل الشـَّريدِ الـْ ما إلو عنوانْ
شـْقدّي يا حلوهْ بـْيشبهـِكْ نيسانْ
شو بـْيشبهـِكْ نيسانْ
ســ 23/11/2014 ــورية – عبـَّاس سليمان علي